adminManaEnadu:ఆఫ్రికా దేశాల్లో మంకీపాక్స్ కేసులు రోజురోజుకు పెరుగుతున్నాయి. ఈ ఏడాది మంకీపాక్స్ వైరస్‌ సోకిన రోగుల సంఖ్య 18,737కు చేరింది. వారంలోనే 1200 కేసులు నమోదయ్యాయి. ప్రాణాంతకమైన క్లేడ్‌ 1 వేరియంట్‌తోపాటు అన్ని రకాల వైరస్‌లతో కలిపి ఈ గణాంకాలు విడుదల చేసినట్లు ఆఫ్రికా సమాఖ్య ఆరోగ్య సంస్థ వెల్లడించింది. మొత్తం 541 మంది మరణించినట్లు తెలిపింది. ఆఫ్రికా ఖండంలో 96శాతం కేసులు, మరణాలు కాంగోలోనే నమోదవుతున్నాయని పేర్కొంది.
మంకీపాక్స్ వైరస్‌ విజృంభణ వేళ ప్రపంచ ఆరోగ్య సంస్థ WHO ఇప్పటికే అంతర్జాతీయ ఆందోళనతో కూడిన అత్యవసర స్థితిని ప్రకటించిన విషయం తెలిసిందే. త్వరలోనే తొలి దశ సిఫార్సుల్ని ప్రచురించనుంది. NGOలతో కలిసి టీకా ఉత్పత్తిని వేగవంతం చేయాలని పిలుపునిచ్చింది. మరోవైపు మంకీపాక్స్ కేసుల పెరుగుదలతో భారత్ అప్రమత్తమైంది.
భారత్‌లో ప్రస్తుతానికి ఎంపాక్స్ కేసులు వెలుగుచూడకపోయినా.. WHO సూచనల దృష్ట్యా వ్యాధి వ్యాప్తి నివారణకు అన్ని జాగ్రత్త చర్యలు తీసుకుంటామని కేంద్ర ఆరోగ్య మంత్రిత్వ శాఖ ప్రకటించింది. అన్ని విమానాశ్రయాలు, ఓడరేవులు, గ్రౌండ్ క్రాసింగ్‌లలోని ఆరోగ్య విభాగాలను అలర్ట్ చేసిన కేంద్రం.. ఎంపాక్స్ వ్యాప్తి పట్ల తీసుకోవాల్సిన జాగ్రత్త చర్యల సంసిద్ధతపై ఉన్నత స్థాయి సమీక్ష నిర్వహించింది. పీఎం ప్రిన్సిపల్ సెక్రటరీ డాక్టర్ ప్రమోద్ కుమార్ మిశ్రా అధ్యక్షతన జరిగిన ఈ సమావేశంలో ఆరోగ్యం, హోం, విపత్తు నిర్వహణ, ఆరోగ్య పరిశోధనల కార్యదర్శులతోపాటు సీనియర్ అధికారులు పాల్గొన్నారు.
అసలు మంకీపాక్స్ అంటే ఏంటి?
ఎంపాక్స్ ఒక వైరల్ వ్యాధి. ఇది వ్యాధి సోకిన జంతువుల లేదా మనుషుల నుంచి వ్యాప్తి చెందుతుంది. జ్వరం, కండరాల నొప్పులు, చర్మంపై పొక్కులు వంటి ఈ వ్యాధి లక్షణాలు. గతంలో వ్యాపించిన వైరస్‌ నోరు, ముఖం, చేతులు, కాళ్లపై ప్రభావం చూపిస్తే ప్రస్తుతం ఎక్కువగా జననేంద్రియాల వద్ద ప్రభావం చూపిస్తోంది.
swarna boddula
Desk
