ManaEnadu:పశ్చిమ బెంగాల్ ((West Bengal)​లోని కోల్​కతా ఆర్​జీకార్ ఆస్పత్రిలో 31ఏళ్ల జూనియర్ డాక్టర్ హత్యాచారానికి ఘటన యావత్ దేశాన్ని వణికించిన విషయం తెలిసిందే. ఈ ఘటనతో ఆమె స్నేహితుడు తీవ్ర మానసిక వేదనకు లోనవ్వడంతో అతడి కుటుంబ సభ్యులు ఆ యువకుడికి కౌన్సెలింగ్‌ ఇప్పించారు. ఇప్పుడిప్పుడే ఆ బాధ నుంచి బయట పడుతున్న ఆ వ్యక్తి డాక్టర్ మృతిపై న్యాయం కోసం ఆమె కుటుంబంతో కలిసి పోరాడుతున్నాడు. ఒకే బ్యాచ్‌కు చెందిన వీరిద్దరూ త్వరలోనే పెళ్లి చేసుకోవాలనుకున్నట్లు సమాచారం.

మరోవైపు ఈ ఘటనకు నిరసగా ఆ ఆస్పత్రి వైద్యులు దాదాపు నెలరోజులుగా రోడ్లపైకి వచ్చి నిరసన (Kolkata Doctors Protests) తెలుపుతున్నారు. తన తోటి డాక్టర్​పై జరిగిన ఈ అఘాయిత్యంపై న్యాయం జరగాలని డిమాండ్ చేస్తున్నారు. ఈ నేపథ్యంలో తాజాగా ఆ రాష్ట్ర సీఎం మమతా బెనర్జీ (Mamata Banergee) చేసిన వ్యాఖ్యలపై మృతురాలి స్నేహితుడు తన ఆవేదనకు అక్షరరూపం ఇచ్చాడు. తనతో లైఫ్ షేర్ చేసుకుంటుదనుకున్న అమ్మాయి ఓ మృగాడి పైశాచానికి బలైపోవడం చూసి ఆ కుర్రాడి గుండె పగిలింది.

తన లైఫ్ పార్టనర్ అవుతుందనుకున్న అమ్మాయి చనిపోయిందని తెలుసుకున్న ఆ యువకుడు ఆమెతో కలిసి బతకాలని కన్న ఎన్నో కలలు ఒక్క రాత్రిలో కల్లలవ్వడం తట్టుకోలేకపోయాడు. ఈ నేపథ్యంలో తాజాగా ఈ ఘటనపై బంగాల్ సీఎం మమతా బెనర్జీ చేసిన కామెంట్స్​పై ఆ యువకుడు తీవ్ర ఆగ్రహం వ్యక్తం చేశాడు. కోల్​కతా డాక్టర్​ ఘటన(Kolkata Doctor Rape and Murder) జరిగి నెల రోజులు దాటిందని, ఇక ప్రజలు దాన్ని మరిచి దుర్గా పూజకు సిద్ధం కావాలని ఆమె కామెంట్స్ చేశారు.
మమతా బెనర్జీ కామెంట్స్​ను నిరసిస్తూ మరణించిన డాక్టర్ స్నేహితుడు ఓ కవితను రాశాడు. తన స్నేహితురాలు మరణించి నెల దాటినా ఇంకా న్యాయం జరగకపోవడం చూసి తన ఆవేదనకు అక్షర రూపం ఇచ్చి కవిత రూపంలో తన బాధను పంచుకుంటూ ఆమె మరణానికి న్యాయం జరగాలంటూ గళమెత్తాడు. ఆ యువకుడి ఆవేదనకు అక్షరరూపం ఇదే.

“ఆనాడు నిండు సభలో ద్రౌపదీ వస్త్రాపహరణం జరిగినప్పుడు ద్రోణాచార్యుడు మౌనంగా ఉండిపోయాడు. శక్తిస్వరూపిణి కొలువైన కోల్​కతా నగరంలో ఓ దుర్గ (మరణించిన డాక్టర్​ను ఉద్దేశిస్తూ) న్యాయం కోసం విలపిస్తోంది. ఓ న్యాయ దేవితా.. నీ కళ్లకు ఇంకా ఆ గంతలెందు న్యాయం కోసం కోల్​కతా నగరం అర్థిస్తోంది. ఈ వేదన భరించలేమంటోంది. నా దుర్గ న్యాయం కోసం పరితపిస్తూ నన్ను అడుగుతుంటే నేను ఏ పండుగూ చేసుకోలేను.” అని అతడు తన ఆవేదనను పంచుకున్నాడు.